جزء الثاني

من طرف **امير العذاب** 15/04/10, 03:56 pm

زايد : عيل الساعه 8 بمر عليك شو
رايك
عبدالله : لالالا انا بييكم بودي شوي الاهل السوق وبعدين بيي
زايد
: اها ... خلاص عيل برايك
عبدالله : اوكى
زايد : مع السلامه
عبدالله
: مع السلامه ...
بعد ما خلص عبدالله.. سار نزل تحت عند خواته وبنات
عمه.. وشافن يشوفن فلم
اجنبي, يلس وياهن وتم يشوف الفلم بعد شوي رن
التلفون..
قامت نوف ترد عليه
نوف : الو
سعيد : السلاااااام عليكم
نوف
: هلا وعليكم السلام والرحمه
سعيد : اشحالج يا غزاله
نوف : بخيررر
الله يسلمك... واشحالكم انتوا وشخبار عمي ومرته
سعيد : الحمدلله كلهم
بخير حبيبتي... اقول
نوف : هلا
عبدالله : امنو نووووف
نوف : سعيد
ولد عمي
عبدالله : عطيني ارمسه
نوف : لحظه
عبدالله : هلا والله
سعيد
: هلا بك .... اشحالك يا ريال
عبدالله بخير حبوب وينك
سعيد :
موجودين شو اخبارك
عبدالله : الحمدلله تمااام
سعيد : واشحال عمي
عبدالله
: الحمدلله بخير
سعيد : الا اقول
عبدالله : امرني
سعيد : ترا
ابوي اليوم عازمكم على العشى ....
عبدالله : والله يا ريت بس انا مشغول
اليوم
سعيد : روح زين انته متى بس مب مشغول ...
عبدالله : شو اسوي
والله بس ربعي اليوم مواعديني
سعيد : ويا ويهك احينه ربعك اهم
منااااااااا
عبدالله : فديت راسك لا بس من زمان ما شفتهم
سعيد :
يالله اجلب ويهك قبل ايام سرت لهم
عبدالله : هههههههه مب ذاكره عليك
سعيد
: قل ماشاءالله تتهرب يعني
عبدالله : لا والله ... خلاص ولا يهمك بنيي
وبقول حق ابويه بعد
سعيد : زين عيل برايك .... لا تنسى تقول حق عمي
عبدالله
: انشاءالله يالله برايك
سعيد : اوكى مع السلامة
عبدالله : مع
السلامه....
بعد ما بند عبدالله ......
نوف : سعيداااااااان شو قالك
عبدالله ؟
عبدالله : وانتي اشلج يالرزه
نوف : صدق
عبدالله :
ماشي قوم عمي اليوم عازمينا على العشى
نوف : اهااا.. الله من زمان ما
سرنا لهم
عبدالله : انتي اصلا بتسيرين هناك عشان سعيد علينا الحركات
نوف
: هههههههه
عبدالله : عيل وين ابويه
مهاري : ما ادري بس اعتقد هو
في المكتب
عبدالله : عيل بروح اتصل حق ربعي
وانتي مهاري سيري اتصلي
بابوي
مهاري : انشاءالله ...
وسارت خبرت ابوها ان عمهم عازمينهم على
العشى ..اما عبدالله سار اتصل في
زايد وتعذر له.. انه ما يقدر يسير لهم
اليوم لانه معزوم..
الساعه 4 اتجهزت مهاري وخواتها وبنات عمها عسب
بيرحون العين مول.. وساروا
ويا عبدالله في سيارته ..وهم حاطين اغاني
ومرتبشين ..ووصلوا العين مول..
وعلى طول تذكرت مهاري حبيب الروح زايد
اللي كانت تشوفه.. قالت في نفسها يا
ربي متى بيمر هاليوم واشوفه باجر
وهو يوصل اخته وحشني والله.. يا ربي يوم
واحد بدون ما اشوفه كانه شهر
يمر علي ..وسرحت لين ما يت عوشة وقطعت حبل
افكارها ..
عوشة : مهاري
والصمخ شو بلاج ؟؟؟
مهاري : لالا ماشي قولي شو تبين
عوشة : شو رايج
بهالقميص
مهاري : ذوقج حلو ....
عوشة : صح انه غالي بس عاجبني حيل
مهاري
: هي وخاصه انه لونه البنفسجي
عوشة : اكييييييد عيناوي
مهاري :
ههههه
لولوه : اقوووووول مهاري وعوشة شوفوا شوفوا منوا ذاك اللي يالس
...
مهاري : وين وين؟
لولوه : هذاك اللي يالس على هالطاوله
عوشة:
اي طاولة فيهن ..
لولوه : اللي يالس ويا حرمة
مهاري: شهقت هذا مب
جنه ...
عوشة : وانتي صااااجه
نوف : شو بلاكن يالسن تطالعن الناس
جذيه
ضحى : ما ادري عنهن
شوق : يالله شو شريتن؟
لولوه : الحقوا
الحقوا شوفوا امنو يالس ويا وحده
نوف : شو صاير؟؟
شوق : هذا جنه
سعيد
نوف : لاااااااااا سعيد مستحيييل
نوف ما صدقت بغى يغمى عليها..
معقوله اللي تحبه راح يخونها ويا وحده
ثانيه.. جذبت عينها ما صدقت..
ونزلت دمعة حااااااره من القلب اااااه يا
سعيد هاي اخرتها جيه تسوي
فيني.. وصاحت من القلب ومهاري تهدي فيهاااا
والبنات كلهن يالسين يهدون
فيها
عوشة : خلاص خلاص تكفين لا تصيحين
نوووووف : سعيييييييييد
لييييييش انا شو سويييييت
مهاري : خفي صوتج الله يخليج الناس بدوا
يطالعووون.. ضحى اتصلي بسرعه في
عبدالله قولي له يي بسرعه
ضحى :
انشاءالله واتصلت فيه
عبدالله ياهن بسرعه : هاه خلصتوا
مهاري : الحق
الحق
عبدالله : شوووو صاير
عوشة : شفنا سعيد ويا وحده ..
عبدالله :
امنوووو
شوق : شفنا سعيد ويا وحده
عبدالله : مب وقته المزح الحينه
شو صاير
ضحى : الله هداك نحن ما نمزح شفناه والله ويا وحده
عبدالله :
من تكووون
مهاري : ما ندري شفنا وحده شقرا يالسه وياه وهو يضحك وياها..
عبدالله
: مستحيل سعيد ما عنده هالخرابيط.. بعدين اكيد واحد يشبهه
ضحى : امبلا
هو ابصم لك والله انه هو انا اعرف شكله عدل ولا يمكن في يوم
اخربط بينه
وبين واحد ثاني
نوف : تجذب عيوننااااا يا عبدالله انا ما اباااااه خلاص
افصخوا خطوبتي لا
ما ابااااااه اكرهه الكلب يجذب علي ويقول انه يحبني
جذااااب.. يالس ويا
وحده احينه بروحه له و بفضحه
عبدالله : شوي شوي
شو هالكلام يا نوف تعالي
ومسكتها مهاري وشوف وعوشة
لولوه : لالا مب
ناقصين فضايح
عبدالله : نوف عيب
نوف : ودني البيت بسرعه
عبدالله :
انشاءالله يالله ...
وسار عبدالله وهو مب مصدق ولا نوووف المسكينه
المنهاره اللي كانت تحبه من
قلبها.. واللي عمرها ما تخيلت اللي يصير..
ومحد كان مصدق ان سعيد يكون جذيه
معقوله ؟؟
نوف اول ما وصلت البيت
ما عرفت شو تسوي غير انها تروح حجرتها ..وتمت تفكر
قالت لالا سعيد ما
يخوني سعيد يحبني بس انا يمكن تسرعت.. بس شو اسوي والله
من حبي له يا
ربي.. بس لازم اثق فيه الحين انا يوم شفته ويا وحده على طول
صحت وما
تمالكت نفسي مب شرط يحبها.. عيل شووو شو يبي فيها ومن تكون ؟
دخل عليها
عبدالله وشافها سرحانه
عبدالله : نوف حبيبتي
نوف ما انتبهت له
عبدالله
: نووووف
نوف : هاه انت من متى هني
عبدالله : توني داخل عليج لا
تشيلين هم حبيبتي انا اخوج وادريبج... صدقيني
سعيد مب راعي هالسوالف
انا اعرفه عاشرته هذا صديق الطفوله
نوف ارتاحت من كلامه : ياريت والله
تدري بكلامك هذا ريحتني ...
عبدالله : انزين يالله قومي بدلي نحن بنسير
من الحين بيت عمي ...
نوف : لالا مابا اروح روحوا انتوا
عبدالله :
ليش لا بتييين
نوف : عبدالله تكفا اخوي والله مب ناقصه ما اريد ما
اريييييد
عبدالله : عيل شو اقول حق امي ؟
نوف : قولها اي شي تصرف
قولها تعبانه ما اريد
عبدالله بعد ما حس انها متضايجه وايد : برايج عيل
وطلع
من عندها وخبر امه
ام عبدالله : ليش نوف ما بتيي
عبدالله : تقول
تعبانه
ام عبدالله : انا بروح اشوفها وانتوا اسبقوني ابوكم في المكتب
بعدين
بيلحقنا
عبدالله : انزين
وسارت مهاري ويا بنات عمها
-----
سارت
الام فوق عند نوف ودخلت عليها وشافت وييها متغير
الام : نوووووف يمه
حبيبتي شو بلاج
نوف : هلا امايه لا مافيني شي شوي تعبانه
الام : شو
بلاه ويهج
نوف : مافيني شي امايه شوي تعبانه
الام : ما بتييين
ويانا
نوف : لا امايه اسفه
الام : لا حبيبتي ما اروم اخليج بروحج جذي
قومي يالله ولا ما بروح انا
نوف : امايه حبيبتي انتي روحي انا بخير شو
بلاج
الام : خلاص ما بسير حبيبتي ما اقدر اخليج بروحج والله بيلس احاتيج
نوف
بعد ما حست ان ماشي فايده ... وما تبي تخرب عليهم : انشاءالله امايه
الحين
بقوم
الام : يالله انا انطرج في السياره ويا اخوج وبنات عمج
نوف :
انشاءالله
وبدلت نوف وسارت وياهم ... وهم في السياره الكل لاحظ سكوت نوف
وكانها في
عالم ثاني.. بعد ما كانت تسولف وتضحك والبسمه ما تفارج
ويهها
ام عبدالله : نوف شو رايج اوديج المستشفى حالتج مب عاجبتني
نوف
ما ردت
ام عبدالله : نوووووف
نوف : هلا امايه
ام عبدالله : ليش
ما تردين
نوف : ما سمعتج شو قلتي
ام عبدالله : قلتلج شو رايج نوديج
المستشفى حالتج مب عاجبتني
نوف : لالالا امايه انا بخير الحمدلله بس شوي
راسي يعورني
ام عبدالله : غريبه اكيد مسخنه
نوف : لالا الحمدلله
ام
عبدالله : عيل شو بلاج؟
عوشة حبت تغير السالفه : اففففف باجر بنرد
لجامعاتنا
شوق : اسكتي الله يخليج ما لحقنا نشتري شي من المول حق
الجامعه
ام عبدالله : عيل سرتوا المول شو تسوون ؟
مهاري بعد ما عطت
شوق وعوشة بنص عين: امبلا شرينا امايه بس الظاهر ذوقي ما
عجبهم
لولوه
: لا عجبنا انتي كله ولا ذوقج
مهاري : بدينا بالطنازه افتكينا من عوشة
تيين انتي
عوشة : هااااه سمعت حد يناديني
لولوه : لالا محد نادج ما
ادري من وين تسمعين انتي
مهاري : افففففف الحين هاي شو بيفكنا من شر
لسانها
عبدالله : بسكن انتن ما تشبعن ....يالله قربنا نوصل
وصلوا بيت
عمهم ... الكل نزل عدا نوف ما كان ودها تنزل عسب ما تشوف سعيد
عبدالله :
نوف يالله انزلي شو تتريين
نوف : مابي انزل
عبدالله : يعني شو اقفل
السياره واخليج هني في الحر
نوف : احسن ولا اجامل سعيد
عبدالله : شو
تقولين انتي يالله يالله انزلي ...
نوف : بنزل والله عشان خاطرك
عبدالله
: يالله انزين
نزلت نوف ... وسارت سلمت على عمها ومرته لكن سعيد ما كان
موجود
عبدالله : عيل وين سعيد ما اشوفه ؟
ابو سعيد : والله طلع بقوم
الحين بتصل فيه
عبدالله : لالا عمي ارتاح انا بتصل فيه
اتصل
عبدالله في سعيد
سعيد : الو
عبدالله : هلا
سعيد : يا مراااااحب
والله
عبدالله : اشحالك
سعيد : تمام الغالي اشحالك انت
عبدالله :
بخير الله يسلمك .. وينك فيه تراي في بيت عمي
سعيد : والله ... ييتوا من
وقت قلت يمكن تتاخرون
عبدالله : لا والله عمي اتصل في ابوي وقاله نيي
الحين
سعيد : خلاص عيل انا الحين برد البيت
عبدالله : يالله ننطرك
سعيد
: اوكى ..باي
عبدالله : باي
بعد خمس دقايق من ضحك وسوالف الا نوف
اللي كانت ساكته طول الوقت والكل
لاحظ.. دخل سعيد عليهم ..وسلم عمه
وعياله الا نوف قرب من نوف عشان يسلم
عليها.. واول ما شافته تغير ويهها
دمعت عينها حست بشي غريب.. سعيد حس انه
في شي مب طبيعي سلم عليها وردت
عليه حاولت تخفي مشاعرها لكن ما قدرت.. الكل
لاحظ ان اول ما دخل سعيد
تغير ويهها ابتسمت له لكن مب من الخاطر عشان تبين
انه مافي شي..
سعيد
: اشحالج نووووف
نوف : تمام... شخبارك انت
سعيد : يسرج الحال
وتغير
ويهها زياده يوم يلس سعيد حذال عبدالله ...
وتموا يسولفووون ويضحكون
الا نوف ...كانت في عالم ثاني عيونها كانت كلها
حزن في حزن
بعد ما
لاحظت ان الكل يطالعها باستغراب حبت انها ما تبين شي
نوف : هههههه شو
بلاها عيونكم علي ما دريت اني حلوه جيه ومعجبيني كثر
عبدالله استغرب
منها بس عرف انها ما تبا تبين لهم شي : هههههه ومن قال انا
نحن معجبين
فيج سيري اطالعي شكلج في المنظره شرات الساحره اللي تطير
بالمخمه
عوشه
: ههههههههههههههه هي وانت صاج عبدالله
نوف : انا ساحره يالاهبل
لولوه
: لاااااااا هاي عوشه
عوشة : مشكوره يا اختي ويي منج اكثر
مهاري :
الله يعيينك سعيد بتاخذ هالساحره
تموا كلهم يضحكون على سوالفهم
سعيد
: حرام عليكم وين بلقا شرات هالقمر هذي
عوشة : هههههه مبين القمر اللي
كانت وياك في المول
نوف تغير ويهها وايد .... وسعيد مب مستوعب الكلام..
وعبدالله خز عوشة بنظره
قويه
ام سعيد : من هاي اللي في المول ؟
ابو
سعيد : اي قمر اللي في المول ليش المول مفتوح من فوق ؟
مهاري تغير
السالفه : هههههههههههه تتمصخر انتوا صدقتوا
عوشة تمت متلومة كيف طلع
هالكلام من لسانها : هههههههه امزح وياكم
سعيد تغير ويهه وايد : انزين
انا بسير فوق بتسبح وبرد
ابو سعيد : اوكى
بعد شوي من قام سعيد لحقه
عبدالله فوق ....
عبدالله : الحمدلله اني حصلت فرصة ارمسك ....
سعيد
: امر
عبدالله : ترا البنات شافوك يوم كنت ويا هاذيج الشقرا في المول
سعيد
: واللللللللللللللللللللللللللللللله.... حتى نوف
عبدالله : هيه من
هاي
سعيد : نوف زعلت ؟
عبدالله : الا صاحت ....
سعيد : ما تسوى
علي والله افدي دموعها
عبدالله : ما علينا من هذي
سعيد : هذي صديقتي
كانت تدرس وياي يوم كنت ادرس في دبي
عبدالله : شو علاقتك فيها
سعيد :
مافي شي بينا لا يروح مخك بعيد ...
عبدالله : عيل شو كنت تسوي وياها ؟
سعيد
: شوف انا ولد عمك وانا عمري ما خبيت عليك شي واقولك كل شي والحين يه
الوقت
اني اقولك.. هذي انا كنت ادرس وياها ..وهي حبتني بس انا ما احبها
والله
بالعكس كنت الجا لها اذا ما فهمت شي كانت هي الوحيده اللي تفهمني
وافهم
منها.. وقابلتها اليوم عشان انهي كل شي بيني وبينها ..عشاني خلاص
مخطوب
وبعدين بتزوج...بس هي كانت تحسب اني انا قابلتها عشاني ابيها ومابا
اضيعها
عبدالله
: انزين كمل شو صار ؟
سعيد : ماشي قلت لها انا الصراحه ما احبج وانا
اليوم قابلتج عشان انهي كل
شي بيني وبينج لكن هي صاحت وكسرت خاطري ما
اعرف شو اقولها.. اخر شي قلته
لها ... انا اسف انا ما قلت لج في يوم
انا احبج لكن انتي تعلقتي فيني..
قالت بس انت خليتني اتعلق فيك
قلت
لها: انا ما كنت اقصد شي بعلاقتي وياج بالعكس انتي كصديقه
عبدالله : بس
ماشي صداقة بين الحرمه والريال
سعيد : صدقني والله ما كنت احبها والله
كانت كصديقه وبس
عبدالله : مصدقك لا تحلف
سعيد : صدقني والله انا
عمري ما حبيت حد غير نوف بس الحين شو اسوي
عبدالله : انا بقولها كل شي
وبفهمها انت لا تخاف ثق فيني انت بس سير اتسبح
وانا بنزل تحت يالله بعد
شوي بيحطون العشا
سعيد : اوكى انت انزل وانا بلحقك
عبدالله : اوكى
نزل
عبدالله وبعد دقايق لحقه سعيد ..... بعد ساعه حطوا العشا وتعشوا .....
وبعدين
يلسوا عندهم شوي
عبدالله : شو رايك بو عسكور تسمعنا من القصايد اللي
حافظها شوي
سعيد : امممممم
بو عبدالله : من زمان ما سمعتنا صوتك
بو
سعيد : هيه والله
عوشه : سعيد يالله عاد
لولوه : شو قلت
سعيد :
انشاءالله على امركم
خذ سعيد نفس عميييق وتم يشل بصوته العذب وهو يطالع
نوف في عيونها ونظراته
كلها حزن واسى :
كنِّي خطا جيتك وقلبي
أحْمِلَه ... حالي شغوف ولا تناظر لهفتي
سر الغرام اللي بقلبي تجهله
... وانته غرامك في حشايه ومهجتي
أنا عطيتك من غرامي أجمله ... وانته
ولا حتى تحس بلوعتي
لو كان تدري بلِّي قلبي يحمله ... حبٍ صدوقٍ وانت
عمري ومنيتي
حبٍ وفيٍ كل اقوله وارسله ... عبر الحروف وينقرا في نظرتي
ليلي
سهر .. ليلي حزن ما أطوله ... لولا طيوفك به تخفِّف علِّتي
أسمع صدى
صوتك وقلبي يسأله ... والقى ردودك هي عذابي وحيرتي
رجواك انا رجوى
الليالي المقبله ... خل السعاده تبتسم في دنيتي
ملّيت من صبري وكثر
الأسئله ... ودي أحس بطعم وقتي وراحتي
وانِّي بقلبك لي مكان ومنزله ...
واهنا بحبِّي وتحقَّق فرحتي
يا ضي عمري وراحته ومستقبله ... يا تاج
راسي لا تزوِّد حسرتي
نوف كانت شوي وبتصيح وهي تناظر عيونه حست بشعور
غريب.. الكل استغرب من سعيد
لما تم يناظر نوف وسر نظراته الغريبه
عبدالله
: صح لسااااانك
مهاري : الللله صوتك ماشاءالله وايد حلو
سعيد : صح
بدنك تسلمين مهاري وعيونج الحلوه
عوووشة : وانا عيوني مب حلوه
سعيد :
انتي .... انتي قمرررر
لولوه : عيل نوف شو تكون ؟
سعيد انحرج بس
تشجع وقال : نوف حياتي ودنيتي كلها
نوف حست بــ قممممة الاحراج كانت
تتمنى ان الارض تنشق وتبلعها
ابو عبدالله : يالله بعد جم شهر بتصير لك
ام
سعيد : فديتها والله نوف
سعيد : بس هي شكلها ما تباني
ام عبدالله :
اشدعوى عاد يا ولدي شو ما تباك وين بتحصل شراتك صح يا نوف
الكل كان ينطر
رد نوف .... وهي كانت منحرجه ما تعرف شو تقول
نوف : هيه اكيد
سعيد
ابتسم ابتسامه ترد الروح
عوووشه : نوف شو بلاه ويهج هههههههههه
نوف :
انجلعي يالله
مهاري : هههههههه لازم تحرجينها يعني
لولوه : ههههههه
تعرفونها هذي
وتموا يسولفون .. وما تاخروا عندهم لان باجر وراهم كليات و
دوامات ...
رجعوا البيت والكل سار غرفته ... اهني استغل الفرصه عبدالله
ودخل على
نوف....
نوف: هلا عبدالله
عبدالله : نوف انا ياينج
ابا اقولج عن سالفه سعيد
نوف : خير شو قالك
عبدالله : جنه الموضوع مب
هامنج
نوف : لو مب هامني جان ما صحت وسويت هالمناحه
عبدالله : ههههه
وانتي الصاجه المهم هذي وحده كانت تدرس وياه في الكليه يوم
كان يدرس
في دبي ....
نوف : يا سلاااااام انزين
عبدالله : شوفي نوف هو قالي
انها هي تحبه وهو قابلها عشان ينهي كل اللي
بينه وبينها
نوف : وهو
ما كان يحبها؟
عبدالله : حلف اكثر من مرة وقال انها شرات صديقته كانت..
كان يطلب منها
المساعده يوم ما يفهم شي كانت الوحيده اللي تفهمه وقاللي
انه ما يحبها بس
هي تعلقت فيه وانه يحبج انتي وبس ماله غيرج
نوف
استحت
عبدالله .. : يعني مكان داعي اللي سويتيه انتي تسرعتي
نوف :
والله من حبي له
عبدالله : لازم تثقين فيه ولا شلون تبين تاخذينه
نوف
: انشاءالله
عبدالله : انشاءالله هذا يكون درس لج
نوف : الحمدلله
...
عبدالله : عيل انا بخليج الحين بسير ارقد
نوف : تصبح على خير
عبدالله
: وانتي من اهله....
بعد ما طلع عبدالله حست نوف براحه ورقدت وهي تفكر
في غزالها
-----
اليوم الثاني نشت مهاري من وقت الصبح..وهي كلها شوق
وامل انها تشوف زايد
..لكن للاسف اليوم هذا ما وصل زايد ميثة يت ويا
الدريول ..مهاري حست باحباط
شدييييد وزعلت لانها ما شافته هاليووم ...

مهاري : صباح الخير
ميثة : هلا صباح الورد يا احلى ورده
مهاري :
صباح المجاملات
ميثه : ههههههه لا والله ما اجامل انتي فعلا احلى ورده
هذا مب كلامي كلام
زايد
مهاري احمر ويهها: الا على طاري زايد ليش ما
وصلج اليوم
ميثه : ههههههههههه ليش تولهتي عليه؟
مهاري : عن البياخه
صج ليش ما وصلج فيه شي
ميثه : تطمني ما فيه الا كل الخير
مهاري :
عيل ؟
ميثه : ماشي ..اليوم ولد عمي بيسافر تعرفينه ربيعه لازم يودعه في
المطار
بيسير يدرس برع وبعدين بيودي ابوي شوي المستشفى.. بيسوي له
تحاليل تعبان
شوي هالايام
مهاري : سلامات والله انشاءالله ما فيه
الا كل عافيه
ميثه : انشاءالله ...عيل وين البنااات ما نسمع حشرتهن
مهاري
: ما ادري عنهن يوم نشوفهن وبعدين يختفن
ميثه : قومي نسير ندورهن
مهاري
: يالله.......
قامت مياثي ويا مهاري يدوروهن.. حصلوا منى وفطوم وساره
وامون ويا بعض
يالسات يسولفن
مهاري + مياثي : سلااااااااااام
كلهم
: وعليكم هلااااا
مهاري : وينكم انتووووا من متى ونحن ندوركم
امووون
: والله يالسات نسولف
مياثي : عيل وين العنووووود ما اشوفها ؟
ساره :
وحليلها مرقدينها في المستشفى
مهاري + مياثي : شوووووووه عن المزح
يالله عاد
ساره : والله ما امزح صج هي في المستشفى
فطوم : هيه حليلها
اخوها سوا حادث وكانت وياه وتعورت
مهاري : فديتها والله وليش ما
خبرتوني هااااه
منى : ما ادري انا اليوم سالت البنات عنج قالولي انج
غايبه
مهاري : من هذووول اللي قالولج جيه؟
منى : قوم ريم
مهاري :
هيه صح انا امس جذبت عليها قلتلها اني بغيب عشان بس افتك من حشرتها
منى :
ليييييش
مهاري : ماشي سالفه مستويه المهم انا لازم اروح المستشفى اطمن
عليها
مياثي : اكيد انا بعد بسير
منى : انا امس رحت لها وبعد اليوم
بسير لها
فطوم : اكيد وانا بيي وياكم
مياثي : وانتي ساره
ساره :
شو بقول بعد اكيد بيي وياكم
امون : نسيتوني
مهاري : لا ما نسيناج
خلاص اليوم بنسير انشاءالله العصر يكون انسب وقت
منى : خلاص العصر
الساعه 5 اوكيه ؟
كلهم : اوكييييه
مياثي : شو اخباركم بعد
ساره :
ماشي الحال مافي اخبار يديده
مهاري : شو ما عرستوا
امون : لا ننطرج
ههههههه
مياثي : لا انطروها قريب بتتزوج
منى + فطوم + ساره : شوووووه
امووون
: عن المزح
مياثي : هههههههه امزح وياكم لا تصدقووون
منى : اتحرا
بعد
فطوووم : الا على طاري العرس ترا عقب شهر عرس اخوووي ولازم تيوون
مهاري
: ما ادري والله احتمال ما اقدر ايي
فطوم : الا بتييييين
مهاري :
بشوووف
فطوم : والله ان ما ييتي بزززززعل منج
مهاري : خلاص خلاص كله
ولا زعلج يالغاليه ...
فطوووم : انزين انتي وبتيين والباجي ما سمعنا
رايهم
منى : اذا مهاري يت اضمني انا يايه
مياثي : انا بعد
اموون :
انا بحاول يمكن اخوي ما يخليني
ساره : انا بعد
فطوووووم : لاااا انا
برمس اخوانكم
امون :: هههههه من صدقج
ساره : خخخخخخخ تبينه ينحرني
فطوم
: هههههههه لابرمس امهاتكم عشان تقنع اخوانكم
ساره : اذا جذيه اكيد
بيوديني ما بيرفض لامي طلب
امون : وانا بعد
فطوم : عيل باجر برمسها
ولا يهمكم
============
في بيت بو عبدالله كان يالس في حجرته دخلت
عليه ام عبدالله
ام عبدالله : غريبه ليش ما سرت المكتب ؟
بو عبدالله :
والله تعبان شوي مالي خلق اسير
ام عبدالله : سلامتك من الشر والله فيني
ولا فيك
بو عبدالله : فال الله ولا فالج يا ام عبدالله لا تقولين جيه
ام
عبدالله : فديتك والله
بوعبدالله : فديت اللي يتفداني ههههه
ام
عبدالله : فديت هالضحكه
بو عبدالله : الا يا ام عبدالله ابي ارمسج في
سالفه ....
ام عبدالله : امر انت بس
بو عبدالله : انتي تدرين ان
بنتنا مهاري كبرت الحين وماشاءالله عليها صارت
عروسه
ام عبدالله :
بدون مقدمات قول شو عندك
بو عبدالله : انزين انا اقصد ان في واحد طلب
ايدها مني
ام عبدالله : والللللللله
بو عبدالله : هيه يا ام عبدالله
ام
عبدالله قامت ويببت بصوت عالي
بو عبدالله : اسكتي عاد بعدنا ما عرفنا
رايي البنت
ام عبدالله : انزين قولي وين شافها؟
بو عبدالله : اهله
شافوها يوم كان ملجة نوف
ام عبدالله : هيييييه
بو عبدالله : وعيبتهم
ويبونها حق ولدهم
ام عبدالله : انزين وانت شو قلت لهم
بو عبدالله :
شو قلت بعد قلت بشاور البنت انتي عاد رمسيها
ام عبدالله : انشاءالله
يابو عبدالله .... بس انت تعرفهم سالت عنهم؟
بو عبدالله : اول شي
شاوريها وعقب نسال عنهم
ام عبدالله : انشاءالله
كانت ام عبدالله
تنطر مهاري بفارغ الصبر الين ما ترد من جامعتها ... عشان
تشاورها وكانت
فرحااانه مب شايلتها الارض من الفرحه بنتها بتتزوج.. بنتها
الغاليه..
كانت تنطر هاليوم بفارغ الصبر تشوف فيها مهاري بتتزوج ....
رجع عبدالله
من كليته وحصل امه يالسه في الصاله فرحانه ومبتسمه
عبدالله :
السلااااام عليكم يا احلى ام
ام عبدالله : هلا والله وليييدي وعليكم
السلام
عبدالله قرب من امه وحبها على راسها : اشحالج اليوم يمه
ام
عبدالله : بخير يعلك بخير ....
عبدالله : الله ويهج اليوم منور شسالفه
ام
عبدالله : منور بشوفتك يا ولدي قولي شخبار الكليه والدراسه
عبدالله :
الحمدلله اليوم كان عندي امتحان سويت زين كان وايد سهل
ام عبدالله :
الله يوفقك يا ولدي....
عبدالله : يمه حطي لي غدا يوعااااان
ام
عبدالله : معليه حبيبي انطر شوي الين خواتك ما يووون انا بسير ازهب
الغدا
وانت روح بدل ثيابك
عبدالله : انزين يمه
سار عبدالله فوق وسارت الام
المطبخ
وصلت مهاري ويا نوف وشوق البيت ....بعد ما خذاهم الدريول.. وكل
وحده سارت
حجرتها تبدل ثيابها ونزلن تحت وحصلن الغدى جاهز
تغدوا
وخلصوا وعقبها يلسوا في الصاله يدقون سوالف وضحك
دخلت ام عبدالله عليهم :
مهاري يمه تعالي شوي ابيج في سالفه
الكل سكت
مهاري : خير امايه
ام
عبدالله : خير بويهج حبيبتي بس ابيج بسالفه
مهاري : انشاءالله
قامت
مهاري وسارت ويا امها حجرتها كانت مهاري مستغربه اي سالفه شو صاير؟؟..
ام عبدالله يلست ويا بنتها على الشبريه ..
ام عبدالله : ما اعرف وين
ابتدي
مهاري : امايه شو صاير
ام عبدالله : لا مافي شي كل الخير
حبيبتي
مهاري : عيل يالله قولي
ام عبدالله : انزين حبيبتي تدرين
الحين انج انتي بنت كبيره وعقلتي
وماشاءالله صرتي بنيه عاقله وفاهمه و
صرتي عروسه
مهاري من يابت امها هالطاري تغير ويهها
مهاري : كملي
ام
عبدالله : والحين الكل يبيج يمه
مهاري انصدمت
ام عبدالله : شو فيج
مهاري
: لاماشي كملي
ام عبدالله : انزين وفي واحد طلب ايدج من ابووج
مهاري
تغير ويهها بالمرة حتى هي انصدمت ما عرفت شو تقول : امنو هذا
ام
عبدالله : اهله شافوج في ملجة نوف وعيبتيهم وحبوا يخطبونج لولدهم
مهاري
صار ويهها جنه حد صااب عليها ماااي بارد ثلج مب قادره تستوعب وتمت
تقول
في نفسها مستحييييل اللي يصير .... انا ماارضى اكوون لحد الا لزايد
وبس
لا لاااااا مستحيل انا مابي حد غير زايد ولا ما بتزوج حد غيره
.....آآآه
ام
عبدالله : مهااااااااري شو بلاج وين وصلتي ؟
مهاري : لا ماشي
ام
عبدالله : أنزين شو قلتي
مهاري تبي تقول انها ما تباه بس قالت لا اتسرع
.. وبقولها اني بفكر في
الموضوع على اساس انها ما تبين ان في واحد محدد
في بالها
مهاري: انزين امايه عطيني وقت افكر
ام عبدالله :
انشاءالله يا بنتي بس متى بتردين علي؟
مهاري: انشاءالله باجر ولا عقب
باجر لان اليوم مشغوله
ام عبدالله : خذي وقتج ....
طلعت عنها امها
ويلست مهاري تقول مستحيل اخذه لالالا انا مابي غير زايد
ليته هو بداله
....وتمت تفكررر وتفكر في اول صدفه لها وياه..رن التلفون
وقطع حبل
افكارها
مهاري : الووو
مياثي : هلااا مهاري
مهاري : هلا والله
شخبارج
مياثي : تمام شو اخبارج انتي
مهاري : اخباري سوده
مياثي :
شووووه عسى ما شر
مهاري: لا ماشي سلامتج
مياثي : يالله عاد شسالفه
مهاري:
ماشي ماشي
مياثي : والله قطعتي قلبي قوووولي
مهاري : السالفه ان
واحد طلب ايدي وانا ماريده
مياثي : لييييش هلج عصبووج عليه
مهاري:
لااااا مستحيل يغصبوني على شي انا ماريده
مياثي : عيل ارفضيه
مهاري:
اكيد برفضه بس شو اقول شو السبب
مياثي: بسيييييطه قولي الدراسه وجذيه
وانج ما تفكرين بالزواج الحينه لانها
بتشغلج عن دراستج وانتي الحين ما
همج الا مستقبلج
مهاري : اممممم والله زين خلاص عيل بقول حق امي برد لها
الخبر باجر
مياثي : وليش باجر؟؟؟؟
مهاري : على اساس اني قلت لها
اني اليوم مشغوله
مياثي : اهااااا اوكيه عيل انا بخليج بسير ارقد شويه
وعقب بنش عسب نسير
المستشفى
مهاري: اوكيه واتصلي في البنات ذكريهم
يا خوفي ينسووون
مياثي : اها خايفه على الفاتوره
مهاري : ههههههه ويا
ويهج لا والله خلاص انا بتصل فيهن
مياثي : ههههه امزح وياج خلاص يالله
انا بتصل فيهن الحين
مهاري : اوكيه عيل يالله انا بعد برقد تعبانه من
هالجامعه
مياثي : اوكيييه نوم العوافي
مهاري : الله يعافيج
مياثي :
مع السلامه
مهاري : مع السلامه
===
بعد ما بندت مياثي دخل عليها
بعد شوي زايد
زايد: كنتي ترمسين منوووه
مياثي : وانته شلك
زايد :
صدق والله ترمسين منو
مياثي : ربيعتي
زايد : اكيد مهاري صح
مياثي
: هيه مهاري
زايد من سمع طاريها سار وقرب من اخته :انزين شخبارها شو
مسويه شو كنتوا
تقولون ...؟
مياثي : افففففف وانته ليش جيه رزه
زايد
: عاد صج شو كنتوا تقولون
مياثي : اشياء خاصه
زايد : الله يخليج
قولي تكفين
مياثي : بشرط
زايد : امري
مياثي : تطلعني باجر لين ما
امل واقولك خلاص لاعة جبدي ابي ارد البيت
زايد : خلاص تم واذا تبين
اليوم بعد مع اني مشغول لكن بفضى لج بس قولي
مياثي : لحظه شو بعد عندي
شرط
زايد : قولي
مياثي : في الويك اند توديني بوظبي
زايد :
تمممممممممم.... بس قولي الله يخليج
مياثي : بعد عندي شرط...
زايد
بصوت عالي : ميااااااااااثي تشوفين هالشاشه والله بكسرها على راسج
حرقتي
اعصابي تراج
مياثي : بل بل انزين خلاص.... بقولك ... بس اخاف تييلك
جلطه من هالخبر
هههههههههه
زايد : هااااه شو صاير تكلمي
مياثي :
بقولك ماشي واحد تقدم لها ويبي يخطبها
زايد من يابت طاري هالسالفه حس ان
الدنيا تلف به وتدور انصدم تفاجا من
الخبر ..... وبشكل مفاجا قال :وهي
شو قالت؟؟؟؟
مياثي : قالت بتفكرررررر وبترد الخبر باجر
زايد :وانا
اناااااا اناااااا
مياثي : هههههههه باجر بترد على امها الخبر انها مب
موافقه
زايد : الله يغربلج يالهبله
مياثي : هههههههههه قلتلك بتييلك
جلطه ما سمعت
زايد : ريحتيني
مياثي : لهالدرجه تحبهاااااا خخخخ
زايد
: خاطري اسمع صوتها
مياثي : انجلع يالله عطيتك ويه زياده
زايد :
تبين اطلعج بعد هااااه لا تخافين مكانج البيت
مياثي : لاااااااا انت قلت
مالي خص والله ان ما طلعتني بقول حق امي
زايد : خلاص يابوي لا تفضحينا
....
مياثي : انزين اسمع اليوم الله يخليك اباك توديني المستشفى لان
ربيعتي
مسويه حادث ابي ازورها
زايد : يحليلها متى سوت الحادث؟
مياثي
: قبل امس
زايد : اوكى بوديج..
مياثي : انزين اطلع يالله ابي ارقد
ساعه 4 واعني انزين
زايد : اوكى انا بسير ايلس على النت شويه من زمان ما
دخلت
مياثي : اوكى
طلع زايد وسار غرفته وشبك عالنت.. فتح المسن ما
حصل حد اون لاين.. شاف عدد
الرسائل في البريد الوارد 1..قال خلني اشوف
من مطرش لي ..فتح الرساله حصلها
من ايميل اسمه مهره وكرت حلو بعنوان
((تدري اني موت احبك وان مالي غير حبك
واللي ينبض في ضلوعي ما هو قلبي
هذا قلبك ((زايد استانس وايد وايد وايد ..
مهاري طرشت له هالكرت يوم
كانت في الجامعه.. وضافها على المسن..في نفس
الوقت كانت مهاري يالسه
عالنت وصلت لها اضافه من ايميل غريب ...استغربت منو
هذا وضافته قالت
خلني اشوف شو يبي؟ .
زايد : السلام عليكم
مهره : وعليكم السلام
زايد
: اشحالج ؟
مهره : تمام منو وياي ؟؟؟؟
زايد : توقعي
مهره : والله
الصراحه ما اعرف حد بهالايميل
زايد : انا زايد
مهاري قلبها وقف هذا
زايد استانست : هلا والله وغلاااااا
زايد : هلا فيج يالغلا كله
مهره :
شو اخبارك ؟
زايد : بخير دامج بخير
مهره : دووووووووم
زايد: الله
يسلمج
فجاه دق الباب اخوها عبدالله واضطرت انها تبند المسنجر في ويهه..
وقامت
فتحت الباب
عبدالله: انتي ما رقدتي
مهاري : مثل ما تشوف
عبدالله
: انزين بسالج امايه شو كانت تريد منج اليوم
مهاري : ماشي
عبدالله :
شو ماشي اكيد شي سالفه
مهاري : السالفه يا اخوي العزيز ان في واحد ياي
يخطبني
عبدالله : وتقولين ماشي
مهاري : مستحيه اقولك
عبدالله :
تستحين من اخووج انزين شو قلتي موافقه وبعدين منو هذا ؟؟
مهاري : سيف ..

عبدالله : هيه عرفته
مهاري : هيه هله شافوني يوم ملجة نوف ويبوني
حق ولدهم
عبدالله : وشو قالت العروس؟
مهاري: عروس عاد لا بعدني افكر
عبدالله
: ترا الكل يمدح فيه وفي اخلاقه صج والنعم ريال
مهاري سرحت في زايد وما
اهتمت لكلامه
عبدالله: حوووه ارمس اليدار انا
مهاري: انزين عطوني
وقت افكر
عبدالله : خذي وقتج عروستنااااا
مهاري : هههههه انزين ممكن
تطلع ابي ارقد
عبدالله: اوكى ... انا بسير عند ربيعي
مهاري : لا تنسى
العصر بتوديني
عبدالله : انشاءالله
طلع عبدالله ... وسارت مهاري
على طول دخلت المسنجر ما حصلته طلع ...
قالت : افااااا طلع
بعد شوي
تريت خمس دقايق ما دخل قالت خلاص بسير ارقد شويه تعبانه.. بندت
الكمبيوتر
وطاحت على شبريتها ورقدت وما حست الا بصوت الساعه وهي ترن في
اذنها..
قامت غسلت ويهها ونزهبت واتصلت في عبدالله وبعد خمس دقايق كان عند
باب
البيت وسارت وياه.. البنات وصلن كلهن بس كانوا ينطرون مهاري لين ما تيي
ووصلت مهاري وكل وحده شاله باقة ورد وعقب دخلن الغرفه
***
وصلن
البنات ..دخلن عندها وسلمن عليها ويلسن شوي عقبها طلعوا من عندها
لانها
تعبانه وما يبون يثجلون ويطولون عليها.. لكن العنود ما خلتهم يسيرون
كانت
ملااااانه بدرجة فطيعه ومستانسه بوجودهم ....
مياثي : ما تدرين والله
الجامعه بدونج ملل
العنود : عاد عن المجامله ترا بصدق عمري
مياثي :
لا ما اجامل والله هذا مب كلامي انا بس كلام كل البنات ولهنا عليج
وعلى
سوالفج......
مهاري: صدقتي ميثوه
منى : متى بيرخصونج؟
العنود :
اممممم تقريبا اسبوع اسبوعين وبرد انشاءالله
امون : الله يقومج بالسلامه
يالغاليه
العنود : الله يسلمج
مهاري : كل البنات وصوني اسلم
علييييييج وايد وايد
العنود : الله يسلمهم ويسلمج
يلسوا يسولفون عن
الجامعه ويحشون في البنات.. وبعد ربع ساعه استاذنت ساره
عنهم وفطوم
وامون لانه اخوانهم برع ينطرونهم
وبعدها سارت مياثي ومهاري ..
======
رجعت
مهاري البيت وبدلت ثيابها ونزلت تحت ما حصلت حد يالس عبدالله طالع ويا
سعيد ونوف في بيت عمها وشوق في غرفتها ..
سارت غرفة شوق لكنها حصلتها
راقده.. ردت مرة ثانيه غرفتها وهي ما تعرف شو
تسوي.. قالت ارقد احسن
لي.. حطت راسها لكن ما يالها رقاد واتذكرت سالفة
اليوم اللي امها قالت
عنها وكيف باجر بتقول لها انها ما تريده.. اه وينك يا
زايد ما شفتك لا
اليوم ولا حتى في الاجازه والله ولهانا عليك حتى ما تسال
عني لهالدرجه
انا رخيصه عندك.. هذا قدر حبك لي.. سارت مسكت التلفون وقامت
تكتبله مسج
..
اموت انا في حبهم.. وارخص انا عيوني لهم.. ناس سكوني قلبي انا وانا
سكنت في
قلبهم..هم علموا قلبي الغرام والشوق كله والهيام.. لا حرمني
الله منهم ..
زايد من وصله هالمسج كان يالس ويا ربعه يضحك ويسولف.. شل
التلفون عشان يشوف
من مطرش المسج كان يحسبه مثل اي مسج عادي ..يوم شاف
مكتوب ((القلب))
المقصود مهاري فرح من قلبه ومب مصدق اول مسج يوصله
منها.. قام من عند ربعه
ولا افتكر فيهم حتى ما فكر يرمسهم او شي قام
ولا عطاهم ويه.. استغربوا
منه.. صحيح اللي سواه غلط بس هو ما حس بعمره
كان فرحاااان وايد حاس بان
قلبه بيطلع من صدره
حميد : شو بلاه هذا؟
حمد
: ما ادري شو جايفنا طوف نحنا جدامه ...
صقر : ما يندرى عنه ....
تصدقون قمت اشك فيه
عبدالله : شو قصدك؟
صقر: يعني يكلم وحده ولا يحب
حميد
: لا يا ريال زايد ما عنده هالسوالف
صقر: ياخي ما تشوفه شلون صاير عمره
ما كان جذي وكل ما نريد نقوله شي يقولي
ماشي
حمد : هههههه هذي
نتيجة تحاليلك
صقر : صدقوووووني تراني مجرب
عبدالله : هههههههه تعترف
بعد ومن هذي تعيسة الحظ
صقر : احترم نفسك وثمن كلامك هذي حبيبة القلب
حمد
: الله يعينها ... انزين لين الحين تحبها
صقر : احبها بس الايام فرقتنا
عبدالله
: ههههههه مستوي العاشق الولهان
صقر : تنطز عبووووود انا براويك
عبدالله
: شو عبود بعد اصغر عيالك انا ...
صقر : عادي ما تفرق عبود بو عابد
عبدالله كله واحد
حمد : انا بسير بلحقه وبشوفه انتوا خلكم هني
عبدالله
: انزين لا تتاخر انت وياه
حمد : اوكى
من قام زايد من عندهم سار كان
يبا يتصل في مهاري .... لكن لحقه حمد عشان
يشوف شو سالفته وخرب كل شي
حمد
: ليش قمت جنك ما صدقت ان وصلك مسج
زايد : اوووهو انت هني ...
حمد :
هي هني ليش مب عاجبك
زايد : لا مب عاجبني
حمد : ليش تكلمني
بهالطريقه
زايد : سلامتك حبوب
حمد : انزين ممكن اعرف شو المسج اللي
وصلك ومن من؟
زايد : مالك خص....
حمد : تدري انك متغير هالايام ما
عدت زايد اللي اعرفه
زايد : شو تباني اسوي يعني
حمد : زايد انت شو
بلاك عمرك ما كنت ترمسني بهالطريقه شو هالبرود
زايد : مافيني شي عادي
شرات ما تشوفني طبيعي ولا انت تشوفني مينون
حمد : هي مينون مادري اشفيك
زايد
: شوف حمد لا تحشرني ترا اللي فيني كافيني
حمد : لا تقول يا شيخ ليش شو
فيك بعد
زايد : حمد قوم عن ويهي مالي خلق اشوف هالاشكال
حمد وهو
معصب : الشرهه علي انا اني اجابلك واجابل اشكالك
زايد : ثمن رمستك وسير
احسنلك قبل لاتحصل كلام ما يعجبك
حمد : لا عيل شو رايك لو اقولك اني مب
ساير بتم كيفي
زايد : عيل تحمل اللي بييك مني
حمد : شو بتسوي يعني
زايد
: انا قتلك من البدايه انجلع عن ويهي لكن انت ما طعت
حمد : انا مب ساير
اريد اعرف شو بتسوي
زايد هني عصب وقامله : من زمان ما كلت ضرب
حمد
وهو بعد معصب : لا عطيتك ويه زياده بتمد ايدك بعد يالله جرب
زايد : انا
لو امد بدفنك هني
حمد : صححححححح انا اللي بدفنك مب انت يالله اشوف مد
ايدك
زايد : صدق انك نذل
حمد : النذل انت واشكالك ....
وقام
كلام كل واحد يعلى على الثاني الكل احتشر على صوتهم العالي وقام حمد
ما
قدر يمسك نفسه يريد يضربه لكن الربع لحقوا عليهم في الثواني الاخيره
ومسكوا
كل واحد من جتفه ....
عبدالله : عيب عليكم زين جيه تيمعون الناس عليكم
صقر
: الله ياخذكم صدق انكم يهال
حميد : والله فشلتونا.... اونكم ريايل بعد
هاه
زايد سار عنهم ولا اهتم بكلامهم ..اما حمد تم متحلف ويسبه حتى
الشباب ما
قدروا يهدونه..وحاولوا يعرفون السالفه لكن هو ما طاع يخبرهم
شي
====
اليوم الثاني مهاري ردت الخبر حق امها وقالت لها انها ما
تريده ولا تريد
تتزوج منه وشرحت موقفها ..امها بالرغم من حزنها لكنها
ما كانت تقدر تغصب
بنتها على شي ما تباه وخصوصا الزواج لان هذي
حياتها...
مر تقريبا شهر وقرب عرس اخو فطوم.. وطبعا كانت مهاري اول
المعزومين لان
فطوم كانت تحبها وايد.. وكانت تتمنى الف مرة لو تكون
مهاري زوجة اخوها..
حتى انها عرضت عليها هالموضوع قبل لكن مهاري رفضت
هالشي كان كل تفكيرها في
زايد وما تريد حد غيره.. مهاري خبرتها عن سبب
رفضها.. فطوم ما قدرت تعارضها
وخصوصا انها تحبه وهو يحبها وتمنت لها
التوفيج والسعاده..فاليوم هذا تجهزت
مهاري حق العرس وسارت الصالون هي
مياثي واختها لان اختها بعد كانت مدعوه
اللي هي نوف ..وبعد ما خلصن
سارن ويا بعض الفندق اللي كانوا بسون فيه العرس
فطووم كانت تنطرهم على
احمر من الجمر ويوم شافتهم وصلوا استانست من
قلبها.. كانت مهاري ولا
القمر ظاهره صدق غزالة عيون كل الحريم عليها ..كانت
بالفعل حلووه..
وخاصه عيونها السوود اللي كانت تذبح..طبعا مهاري ورباعتها
كانوا يالسين
الطاوله اللي جنب الكوشه.. وكانوا يالسين يسولفن وفرحانين
قامت فطوم
وطلعت عالكوشة ورقصت ومسكت مياثي وياها.. مياثي كانت مستحيه
لكنها رقصت
غصبا عنها اما مهاري البنات كلهن كانوا يقولن لها لكن هي ما رضت
الا
ان يت فطوم ومسكتها وخلتها تقول وترقص كانت كلها رقـــــه وهي
ترقص..طبعا
ما طولت مهاري هي ورباعتها غير ثلاث او اربع ساعات و روحن
عقبها..
وصدق كانت مستانسه مهاري هاليوم ..
======
مرت الايام ومهاري تشوف كل
يوم زايد عن طريق صديقتها مياثي وكل يوم تتعلق
فيه زياده وهو يتعلق
فيها زياده ..اما حمد وزايد فكل ما كانت تجمعهم الصدفة
انهم يشوفون بعض
ما كانوا يرمسون ويا بعض ولا حتى يسلمون ..حتى الشباب
ملوا منهم ومن
طريقتهم ..
اما زايد كان ينطر الفرصه المناسبه عشان يخبر امه وابوه انه
يريد يخطب
مهاري.. كان يتريا بفارغ الصبر اليوم اللي بيتزوجها فيه..
كان دايم مجتهد
في دروسه يريد يخلص الكليه عشان ياخذها..كانت هي حياته
وقلبه وتفكيره وكل
شي بالنسبه له .....
***
في الكليه ربع
عبدالله كلهم كانوا يالسين
زايد : عبدالله
عبدالله : لبيه
زايد :
انت اليوم مب طبيعي
حميد : شكله تعبان
عبدالله : ما ادري احس بدوخه
وصداااااااع قوي
زايد : من شو؟؟؟؟
عبدالله : مادري احيانا وانا اسوق
حتى تجيلي هالدوخه والصداااع احس بتعب
فظييييع فجاه
حميد + صقر:
سلاماااااات
عبدالله : الله يسلمكم من الشر
زايد : وسرت المستشفى ولا
كالعاده مطنش؟
عبدالله : لا ما سرت
زايد : من متى و هالحاله تييلك ؟
عبدالله
: من فتررررررره ... يعني قول من زمان
زايد : شوووووف العصر انا وانت
بنسير وغصبا عنك رضيت ولا
عبدالله : شو بيسون يعني كالعاده حبوب وادويه
ما منها فايده
زايد : على الاقل نطمن عليك
عبدالله : اوكى مب مشكله
برايك لا تعب نفسك انا بسير
زايد : لا ارتاح بيي وياك
حميد : وانا
بعد يااااي
صقر : نسيتوني ؟
زايد : هههههه سايرين المستشفى نحن بناخذ
جيش
حميد : عادي
صقر : وين حمد؟
زايد : لا تيب طاريه الله يخليك
كرهني فيه
صقر : هذي اخرتها زيوووود الريال ربيعنا ما يصير تقول جذه
زايد
: روح لاه انت بعد اونك الحين الصديق الوفي
صقر : هههههههه والله انت
حاله
زايد : بعدين انا اصغر عيالك زيود في عينك
صقر : زيتون احلى
هههههههههههه
زايد : وايد سخيف تصدق خربت اسمي
صقر : اصلا هو من زمان
خربان عليك مب راكب
زايد : ليش محتر لانه اسمي حلووو
صقر : وانا
بعد حلو
زايد : صقر ولا عنز
حميد : هههههههههههههههههه انتوا
متفيجين والله ......... الريال تعبان
وانتوا يالسين اللي صقر واللي
عنز .....
=============
رجع عبدالله البيت وهو مب قادر يتحمل اي شي
حتى يوم دخل البيت ما سلم على
امه على طول طلع فوق ورقد..دخلت عليه بعد
شوي امه حصلته راقد .... ما قدرت
تواعيه عذرته لانه تعبان ياي من
الكليه..رقد عبدالله وما حس بعمره الا
التلفون يرن عن اذنه.....
عبدالله
: خير
زايد : انت بعدك راقد قم يالله
عبدالله / الساعه جم
زايد :
اربع ونص يالله قم بسرعه الحين بمر عليك
عبدالله : انزين يابوووووك
فكنا يالله بند
زايد : ما ببند هههههه
عبدالله : يالله بند
زايد :
قم اول
عبدالله : والله بقوم بس بند
زايد : اوكى يالله عيل باي
عبدالله
: باي
..........
قام عبدالله وتجهز وبعد نص ساعه كان زايد عند باب
البيت وسار وياه المستشفى
والربع كلهم كانوا وياه ..عبدالله صحيح ان
كانت حالته ما تسر لكنه كان
متماسك..راسه بعده يعوره وفيه الدوخه لكنه
متحمل وكان يالس يضحك ويسولف
غصبا عنه ما كان يريد يبين لهم انه
تعبان..لكنه فشل جدام زايد.. زايد كان
يعرف انه تعبان ومتحمل لانه يعرف
طبع عبدالله ما يحب حد يخاف عليه ولا
يحاتي...
وصلوا المستشفى
وبسرعه دخلوه ..الدكتور سواله اشعة وتحاليل وقاله باجر يجي
..وعطاه
بندول وشوي حبوب مسكنه تخفف عنه..
بعد ما رجع عبدالله قال لامه انه كان
في المستشفى وامه وايد خافت عليه بس
هو طمنها قالها ان ما فيه شي بس
شوي يحس بدوخه ....
وعقبها سار عبدالله داره وارتاح ...
..........
اليوم
الثاني مهاري قامت من رقادها سارت كليتها وكالعاده شافت زايد وهالمرة

هو بنفسه عطاها ورده وهي كانت ميتة ومتشققه من الفرحه اما عبدالله كان
تعباااان
وايد ومب قادر يتحرك او ينش من مكانه حالته كل يوم تزيد سؤء بس هو
كان
يتحمل دوم..امه شافت الوقت تاخر وولدها ما نزل معقوله طلع من دوم ما
يسلم
لالا مب من عوايده..سارت فوق عند حجرة عبدالله فتحت الباب شافته راقد
ويهه
محمر..خافت عليه يوم شافته على هالحاله
ام عبدالله : حبيبي اشفيك
عبدالله رد علي
عبدالله بصوت خافت : هلا يمه
ام عبدالله : ليش ما سرت
الكليه
عبدالله : تعبااااان مب قادر
ام عبدالله : يمه اشفيك انت كل
يوم حالتك تزيد قوم بخلي ابوك يوديك
المستشفى .... تراه اليوم ما سار
المكتب
عبدالله : لا امايه فديتج انا شوي تعبان خليني ارتاح وما يحتاج
المستشفى
امس ساير
ام عبدالله: حبيبي ما اقدر اشوفك على هالحاله
عبدالله
: يمه قتلج خليني ارتاح وبتشوفيني بخير اريد انام تعبااان
ام عبدالله :
برايك يا ولدي خلاص بخليك
=======
وصل زايد الكليه والربع كلهم
موجودين ....بس للاسف ما كان عبدالله موجود
لانه تعبان.. الكل استغرب
عدم وجووده مع انه العاده يكون اول الحضور..زايد
كان يتصل فيه لكن
للاسف جهازه مغلق
حميد : شو بعده مغلق؟
زايد : هيه يعطيني مغلق
صقر
: وينه هذا
حميد : علمي علمك
زايد كان وايد خايف عليه لانه امس لاحظ
عليه انه كان تعبان بس متحمل ..فقرر
انه يسير له البيت لانه ما عنده
رقم البيت.. عشان يتصل يطمن ..
زايد : انا بسير له البيت
حميد : انت
شو تقول اليوم ما عندك امتحان ولا
صقر : هي انا وهو علينا امتحان
زايد
: يولي الامتحان والله انا بسير
حميد : انت غبي بيحطولك زيرو
زايد :
انشاءالله ابو الزيرو قلت بسير يعني بسير
صقر : انا بيي وياك
زايد :
لا خلك هني وياهم
صقر: ما اريد قلتلك بيي وياك
حميد : خذوني انا بعد
كان
حمد يالس وما تكلم بكلمه لكن يوم شافهم بيسيرون قال
حمد : خذوني وياكم
وقاموا
ويا زايد وركبوا موتره وساروا بيت عبدالله..وصل زايد مع ان هاليوم
نفسه
عليه امتحان بس خوفه على عبدالله كان اكبر ....
نزلوا كلهم من السياره
... وسار دق الجرس زايد فتحت له الخدامه ..ابو
عبدالله من شافهم عرف
انهم ربع عبدالله وعرف انهم يووا عشاان يطمنون عليه
ابو عبدالله :
حيالله من يانا
زايد : الله يحييك عمي
طبعا بعدها سالوا عن عبدالله
لكن ابو عبدالله طمنهم عليه وقالهم انه راقد
الحين تعبان شوي..زايد هدا
بعد ما طمنهم ابو عبدالله
وعقبها يلسوا شوي ويا ابو عبدالله وساروا لان
وراهم كليه....
======
طبعا طافه الامتحان زايد... لكنه ما اهتم لان
عبدالله اهم من كل امتحانات
الدنيا
==========
العصر ....سار
زايد المستشفى ...اما عبدالله ما قدر يسير وياه كان بعده
تعبان..
هالمره سار زايد بروحه ..وقاله الدكتور انه مافيه شي ...
زايد ما تطمن
لان مب معقوله هالتعب كله ومافيه شي ..وكلم ابو عبدالله على
اساس انهم
يسافرون برا ويسون له تحاليل واشعه ويطمنون عليه اكثر .ابو
عبدالله على
طول وافق لانه شاف ولده فعلا تعبان هالايام ....وقرروا انهم
يسافرون
بعد اسبوع ..مهاري كانت تبا تسافر وياهم لكن للاسف وراها الكليه
وما
يصير تخلي الكليه..اما زايد قرر انه يسافر وياهم ولو انه امه ما كانت
موافقه
يهد دراسته لكن بعد ما شافت انه مصر وانه عبدالله ربيعه ربيع
الطفوله
ما قدرت توقف في ويهه ..عبدالله كانت حالته كل يوم تزيد ومب قادر
يستحمل
زياده كان يخفي تعبنه ويتحمل جدامهم ..حتى انه مرة حاول ينزل تحت
عند
ابوه كان هذا اليوم الاخير وباجر بيسافرون المانيانزل تحت وكان راسه
يعوره
وفجاه يت له الدوخه وطاح مكانه ..مهاري كانت يايه من المطبخ شافته
صارخت
صرخه سمعت البيت كله ..ابوها ياااا وهو يركض ونوف وشوق وامهم..وشافوا

عبدالله طايح ابو عبدالله شله وركب سيارته سارت مهاري يابت عباتها هي
وامها
وطلعن وياه
الام كانت تصيح طول الدرب ومهاري كانت وياها بس كانت بينها
وبين نفسها
..وصلوا المستشفى ودخلوه الطواري بسرعه ...
بعدين طلع
لهم الدكتور وهو شكله حزين ..الام من شافت الدكتور قامت عنده
وقالهم ان
عبدالله فيه ورم في المخ وهذا الشي تطور عنده وانه محتاج عمليه
اليوم
ولا بيموت وما بيتحمل الالم ..واحتمال العمليه تنجح واحتمال لا..الام

كانت تصيح وهي تدعي ربها وابو عبدالله قلبه بتقطع على ولده نزلت دمعة من
عينه
وكان يدعي الله انه تنجح العمليه لانها بتستغرق وقت اما مهاري كانت
تصيح

من طرف **نسيم الفجر** 16/04/10, 07:13 am

اشكرك اخي علي روعتك بتمني المزيد مب ابداعاتك

جزء الثاني

جزء الثاني

رد: جزء الثاني